الرئيسية » » #زئير_الأسد | سعيد شحاته

#زئير_الأسد | سعيد شحاته

Written By Hesham Alsabahi on الأربعاء، 8 أكتوبر، 2014 | 9:13 ص

#زئير_الأسد

.....................

ما فيش مشكلة أبدًا إنك تكون ما بتعرفش تمسك العصا من وسطها، لأن وسط العصا ناعم وإيديك خشنة، يبقى سيبها للخوا ــات.. هيمسكوها كويس... هم متعودين على كدا 
ولا في أدنى مشكلة إن برضه ما تكونش بتعرف ترقص على الحبال زي بتوع السيرك، علشان أكيد الشمس صالبة عودك ووسطك ناشف، يبقى آمن بالتخصص وسيب الرقص لناسه
وما فيش أي أزمة إن لسانك يكون متبري منّك، وإن عنيك تكون بتّرجم اللي في قلبك قبل ما دماغك يفكّر في ترجمته بشكل مزيف
أنت حاسس إنك كائن مظلوم وحقك ضايع.. وإن كدابين الزفّة الكتار شايفينك كالتالي..
الكلاب بتاكل على قفاك عيش بالكوم، والتعالب بتقول إنك كائن عشوائي وسهل، والضباع فرحانة بوجود صيد أهبل زيّك بينهم... والتعابين والأفاعي سايبينك لوقت عوزة.. والحشرات بيتسلوا بنرفزتك عليهم

المشكلة إن الحيوانات دي كلّها ممكن تكون قرت رباعية صلاح جاهين اللي بتقول

"يوم قلت آه .. سمعوني قالوا فَسَدْ
ده كان جدع قلبه حديد واتحسد
رديت على اللايمين أنا وقلت
آآآآآآآآآآآآآآآآآآآآآآآآآآه
لو تعرفوا معنى زئير الأسد."

ولأنهم حيوانات رددوها كتير ولا فهموش معناها....

............................

سعيد شحاتة


التعليقات
0 التعليقات

0 التعليقات:

إرسال تعليق

يتم التشغيل بواسطة Blogger.